Русија соопшти дека во текот на ноќта се соочила со еден од најголемите напади со беспилотни летала од почетокот на војната, при што, според руските власти, биле пресретнати или уништени вкупно 419 дронови.
Во Московската област, дрон погодил семејна куќа, при што загинало шестмесечно бебе. Од урнатините спасувачите извлекле двајца возрасни и две деца, соопштија локалните власти.
Во меѓувреме, Украина соопшти дека повторно го погодила сателитскиот комуникациски центар во Дубна, северно од Москва. Според украинскиот претседател Володимир Зеленски, објектот се користи за координација на руските воени операции.
Руските власти не потврдија дека воениот објект бил погоден, но гувернерот на Московската област изјави дека дрон оштетил административна зграда во Дубна, додавајќи дека во тој инцидент нема жртви.
Градоначалникот на Москва, Сергеј Собјанин, соопшти дека противвоздушната одбрана соборила повеќе од 60 дронови кои се движеле кон главниот град.
Од Кремљ ги осудија нападите, а портпаролот Дмитриј Песков изјави дека во нив страдаат цивили и дека загинуваат деца.
Во услови на воен конфликт, тврдењата на двете страни не можат независно да бидат потврдени, а информациите за целите и последиците од нападите продолжуваат да се ажурираат.
