Висок функционер задолжен за снабдување со муниција во руската армија загинал откако бомба експлодирала во неговиот автомобил во близина на Москва, додека истовремено биле пријавени и нови напади со украински дронови врз цели длабоко на руска територија, објави „Гардијан“.
Според руските медиуми, во експлозијата животот го загубил Дамир Давидов, раководител на ракетно-артилериската управа при руското Министерство за одбрана. Инцидентот се случил во градот Балашиха, во близина на руската престолнина, додека тој управувал со возило „БМВ Х3“.
Полицијата и истражните органи наведуваат дека експлозивната направа била поставена под возачкото седиште. Очевидци изјавиле дека Давидов починал на самото место, пред пристигнувањето на итната медицинска помош.
Во текот на истрагата, властите подоцна откриле и друга експлозивна направа во уште едно возило во југозападниот дел на Москва. Таа била контролирано детонирана од безбедносните служби, со цел да се избегнат дополнителни жртви.
Случајот се надоврзува на серијата напади врз лица поврзани со руските воени структури од почетокот на војната, при што дел од нив биле директно поврзани со операции на украинските служби, додека други останале неразјаснети.
Истовремено, украински дронови погодиле нафтена рафинерија во рускиот град Самара, при што објектот „Кујбишевски“ бил зафатен од пожар по нападот. Рафинеријата се наоѓа околу 800 километри од границата со Украина, што укажува на проширување на досегот на нападите.
Дополнително, во градот Чебоксари, главниот град на руската република Чувашија, бил погоден истражувачко-производствен комплекс кој, според украинската воена разузнавачка служба, произведувал компоненти за руската одбранбена индустрија, вклучително и делови за беспилотни летала и ракети.
Украинските власти редовно изведуваат напади врз воена и индустриска инфраструктура на руска територија, со цел, како што наведуваат, да се намали капацитетот на Москва за продолжување на воените операции. Руските власти засега не објавиле информации за евентуални жртви во последните напади.
