Десетгодишно момче преживеа вистинска драма на една плажа во Франција откако било затрупано под песок додека копало дупка или тунел. Инцидентот се случил околу 19:30 часот, кога на плажата сè уште имало голем број посетители.
Според информациите на францускиот медиум „Паризиен“, сведоци веднаш притрчале и почнале да копаат за да го спасат детето. Благодарение на нивната брза реакција и укажаната прва помош, срцето на момчето повторно започнало да чука уште на самото место.
Детето било во тешка здравствена состојба, по што со хеликоптер било пренесено во болница во Бајон.
Трагичниот настан ги вознемири локалните жители, а дополнително ја зголеми загриженоста фактот дека ова е втор ваков инцидент за само една недела.
Во друг случај, кој се случил претходно во Италија, седумнаесетгодишно момче загина на сличен начин на плажата во Монталто ди Кастро. Според извештаите на агенцијата Анса, тинејџерот копал дупка длабока околу еден и пол метар заедно со своите помлади браќа. Откако тие си заминале, тој останал сам во дупката, која потоа се срушила, затрупувајќи го целосно.
Таткото, кој се наоѓал во близина, забележал дека детето го нема и започнал со пребарување. Присутните пливачи веднаш реагирале и се обиделе да го извадат, но безуспешно. Наскоро пристигнале итните служби – пожарникари, полиција, карабињери и хеликоптер за спасување, но лекарите само можеле да ја констатираат смртта.
Овие два случаи ја отвораат темата за опасностите од копање длабоки дупки во песокот, особено кај млади лица, и важноста на поголема свесност и надзор на плажите.
