Голема полициска акција е во тек во Даниловград, Црна Гора, откако на стрелиште во близина на градот биле пронајдени безживотните тела на тројца мажи.
Според информациите од црногорската полиција, околу 17 часот сопственикот на стрелиштето „Чешка збројевка“, М.Ј., ја известил дежурната служба дека во објектот затекнал три машки тела.
Полицијата веднаш излегла на местото, а во поширокото подрачје биле воспоставени засилени контроли. Регионалните медиуми објавуваат дека полицајците запираат и проверуваат возила кои се движат од Даниловград кон Подгорица.
Според досега објавените информации, загинатите се П.Г. (24) од Подгорица, М.Р. (67) од Даниловград и Н.К. (20) од Подгорица.
Неофицијално се наведува дека тројцата биле вработени како инструктори на стрелиштето. Во медиумските извештаи се објавени и нивните имиња, но полицијата првично соопшти дека работи на официјално утврдување на идентитетот на починатите.
По налог на државен обвинител од Вишото државно обвинителство во Подгорица се врши увид и се прибираат докази за да се утврди што точно се случило и под кои околности било употребено огненото оружје.
Полицијата ги повикала граѓаните да останат во своите домови додека трае потрагата по вооружениот осомничен.
Засега не се објавени информации за мотивот, ниту за идентитетот на лицето по кое се трага.
Истрагата продолжува, а црногорската полиција најави дека јавноста ќе биде информирана веднаш штом бидат утврдени повеќе детали за тројното убиство.
