По повеќе од еден месец неизвесност, италијанските спасувачки служби го пронајдоа телото на Луиџи Кавалари (84), сопруг на министерката за семејство Еуџенија Рочела. Тој исчезна на 27 јуни додека се капел во езерото Вико во покраината Витербо.
Телото било откриено од полициски нуркачи по долготрајна и сложена потрага, во која учествувале специјализирани тимови од различни делови на Италија. Поради слабата видливост, калливото дно и густите алги, спасувачките екипи користеле сонари и подводни роботи за да го пребараат езерото.
По извлекувањето на телото, обвинителството во Витербо наредило обдукција, која треба да ги утврди точните околности и причината за смртта.
Според информациите на италијанските медиуми, трагедијата се случила додека Кавалари и неговата сопруга престојувале во нивната семејна куќа покрај езерото. Откако скокнал во водата, тој накратко повторно се појавил на површината и се пожалил дека не се чувствува добро, по што исчезнал под водата.
Токму министерката Еуџенија Рочела веднаш ги повикала службите за итна помош, по што започнала обемна потрага која траела повеќе од еден месец.
Луиџи Кавалари бил инженер, универзитетски професор и академик. Со министерката Рочела оваа година одбележале 50 години брак и имаат две деца. И покрај јавната функција на Рочела, семејството својот приватен живот го чувало далеку од очите на јавноста.
Неколку дена по неговото исчезнување, министерката јавно им се заблагодари на сите што испратиле пораки со поддршка и сочувство, додека потрагата сè уште траеше. Трагичниот исход сега стави крај на долгата неизвесност за семејството.
