Двајца пациенти го загубија животот, а најмалку 34 лица се повредени во пожар што избувна рано утринава во болница во германскиот град Лудвигслуст. Инцидентот предизвика голема мобилизација на спасувачките служби, додека во тек е целосна евакуација на здравствената установа.
Според првичните информации, огнот најпрво избувнал во една болничка соба, а потоа се проширил кон покривната конструкција на Одделот за радиологија. Дојавата до противпожарните служби била примена околу 4:30 часот, по што на местото веднаш биле испратени бројни противпожарни екипи од Лудвигслуст и околните населени места.
Надлежните соопштија дека пожарот е ставен под контрола и дека повеќе нема активен пламен, но спасувачките операции и понатаму траат. Во меѓувреме, се евакуираат сите пациенти од болничкиот комплекс, вклучувајќи ги и лицата кои биле сместени во придружните објекти.
Евакуираните пациенти се префрлаат на безбедни локации во рамките на болничкиот круг, каде што им се обезбедува неопходна медицинска грижа. Одделот за итен прием, кој привремено беше затворен поради инцидентот, повторно е ставен во функција за прием на нови пациенти.
Германските медиуми јавуваат дека засега нема официјални информации за сериозноста на повредите кај лицата кои биле погодени од пожарот, додека истрагата за причините за избувнувањето на огнот е во тек.
Поради густиот чад што се ширел од болницата, локалните власти упатија предупредување до жителите во околината да ги држат затворени прозорците и вратите во своите домови сè додека не се нормализира состојбата.
Пред болницата се собрале голем број членови на семејствата на пациентите, кои со часови чекаат информации за своите најблиски. За да им се помогне во оваа тешка ситуација, надлежните отвориле и посебна телефонска линија преку која семејствата можат да добијат информации и поддршка.
