Трагичната смрт на 38-годишниот Лука Палатинуш од Паловац во Меѓимурје предизвика бројни реакции во Хрватска, откако младиот претприемач починал во болницата во Чаковец каде што побарал медицинска помош поради болки во градите и многу висок крвен притисок.
Неговото семејство сега бара одговори за тоа што точно се случувало во часовите пред неговата смрт и дали трагичниот исход можел да биде спречен.
Според неговиот татко Стјепан Палатинуш, Лука веќе третпат барал лекарска помош поради исти или слични проблеми. Таткото тврди дека таа вечер неговиот син пристигнал со сопругата, со крвен притисок околу 200.
Тој изнесува и тврдење дека при пристигнувањето на Лука наводно му било кажано: „Повторно ли дојде?“, како и дека неговиот син барал да биде примен и прегледан.
Во еден момент Лука ја замолил сопругата да му донесе студена вода. Кога таа се вратила, неговата здравствена состојба веќе била сериозно влошена.
Болницата објави поинаква верзија за текот на лекувањето
Од Жупаниската болница во Чаковец соопштиле дека Лука бил примен на 19 август во 22:34 часот и веднаш бил медицински обработен.
Според болницата, му биле измерени крвниот притисок и пулсот, била направена ЕКГ-снимка, земена крв за лабораториски анализи и му била дадена почетна терапија. Пациентот бил распореден во третата тријажна категорија.
Околу 23:45 часот, по пристигнувањето на лабораториските резултати, Лука повторно бил повикан на преглед. Од болницата наведуваат дека резултатите биле уредни и дека било планирано по еден час повторно да му биде земена крв, по што се вратил во чекалницата.
Околу 00:20 часот неговата состојба нагло се влошила. Медицинскиот персонал веднаш започнал со реанимација, која според болницата траела околу 50 минути, но лекарите не успеале да го спасат.
Случајот отвори прашања во хрватската јавност околу медицинскиот третман и надзорот на 38-годишниот пациент. Сепак, од достапните информации не може да се заклучи дали во постапувањето имало лекарски пропуст, ниту дали поинаква постапка би го спречила трагичниот исход.
Семејството очекува одговори од надлежните за точните околности што довеле до смртта на Лука.
