Тринаесетгодишно дете е во исклучително тешка здравствена состојба по сериозен инцидент што се случил во скопската општина Чаир. Детето било повредено со нож за време на тепачка на улицата „Македонско-косовска бригада“, дознава Телма од свои извори.
Според болничките информации, состојбата на 13-годишникот е исклучително тешка, поради што лекарите се борат за неговиот живот.
Во инцидентот, според информации од Министерството за внатрешни работи, учествувале вкупно пет лица – четворица малолетници и едно полнолетно лице.
Во текот на пресметката биле употребени ножеви и безбол-палки, а полицијата сега работи на утврдување на точниот тек на настанот и на улогата што ја имал секој од учесниците.
Еден од малолетниците, роден во 2012 година, според досегашните информации, признал дека користел нож за време на инцидентот. Сепак, тоа само по себе не е доволно за да се утврди дали токму тој предмет бил употребен при нанесувањето на тешките повреди на 13-годишното дете.
Одговорот на ова прашање треба да го дадат форензичките анализи, преку кои надлежните ќе се обидат да ги утврдат сите релевантни материјални докази.
Неговиот брат, роден во 2007 година, засега одбива да даде исказ пред надлежните органи.
Полицијата продолжува со расчистување на случајот и со собирање докази и информации од сите учесници и други лица кои би можеле да помогнат во утврдувањето на околностите.
Според досегашните информации, се подготвува кривична пријава за обид за убиство, но конечната правна квалификација на делото ќе ја утврди надлежното јавно обвинителство врз основа на собраните докази.
Истрагата треба да покаже како дошло до конфликтот, што му претходело на инцидентот и каква била улогата на секој од петтемина учесници. Особено важно ќе биде и форензичкото вештачење, кое треба да помогне во утврдувањето на фактите поврзани со повредувањето на 13-годишникот.
Во меѓувреме, детето останува под лекарски надзор во болница, каде што неговата здравствена состојба се оценува како исклучително тешка.
