Познати се деталите за здравствената состојба на 83-годишниот скопјанец кој е првиот регистриран смртен случај од западнонилска треска во Македонија годинава.
Мажот бил лекуван на Клиниката за инфективни болести и фебрилни состојби, каде што била потврдена инфекцијата со вирусот на западнонилска треска.
Според информациите од Институтот за јавно здравје, првите симптоми кај пациентот се појавиле на 2 август. Почетокот на болеста бил проследен со покачена телесна температура, треска и главоболка, а пациентот чувствувал и изразена општа слабост.
Дополнително, биле присутни болки во зглобовите и мускулите, како и вкочанетост на вратот. Во текот на состојбата било забележано и нарушување на свеста, што укажувало на посериозна клиничка слика.
Кај 83-годишниот пациент била утврдена и клиничка слика на менингитис, додека истовремено биле присутни и други здравствени состојби кои дополнително ја комплицирале неговата состојба.
Присуството на вирусот на западнонилска треска било потврдено преку серолошко испитување на ликворот, односно течноста која го опкружува мозокот и 'рбетниот мозок. На тој начин било потврдено дека пациентот бил заразен со вирусот.
Случајот претставува прв регистриран смртен исход од западнонилска треска во Македонија во текот на оваа година, откако претходно беше соопштено дека инфекцијата била потврдена кај пациентот кој се лекувал на Клиниката за инфективни болести и фебрилни состојби.
