В. З. (20) од Градско доби пет години затвор за сообраќајната несреќа што се случи пред 15 месеци во близина на Кавадарци, а во која загина Марјан Петровски (40) од Велес. Судот исто така ѝ изрече забрана за управување со моторно возило од „Б“ категорија за период од пет години.
Сообраќајката се случи на 5 ноември 2024 година, околу 08:45 часот, на регионалниот пат Кавадарци-Росоман. Возилото „сеат“ кое го управувала В. З. удрило во „опел“, при што сопатникот во „опелот“ загинал, а двајца други патници, вклучувајќи ја сопатничката од возилото на обвинетата, се здобиле со тешки повреди – политраума.
Обвинетата, која во моментот на несреќата имала 18 години, била лоцирана во Германија, а по апсењето се наоѓа во имиграционен притвор. Постапката за нејзино испорачување во Македонија веќе е започната.
Пресудата не е правосилна бидејќи бранителот на обвинетата поднел жалба, а Основниот суд Кавадарци веќе издал потерница по која се постапува за доведување на обвинетата во земјата.
Според судот, несреќата била предизвикана од тоа што возачката ја преминала линијата на коловозот и возела со поголема брзина, но не била под дејство на алкохол или опијати.
