Американскиот глумец Мајкл Медсен почина на 67 години во својот дом во Малибу, Калифорнија, поради срцев удар, потврди неговиот менаџер Рон Смит. Смртта настапила вчера во 8:25 часот, а итната служба која пристигнала на местото само ја констатирала.
Медсен е најпознат по своите незаборавни улоги во филмовите на Квентин Тарантино, вклучувајќи ги „Касапски кучиња“ (Reservoir Dogs), „Убиј го Бил“ (Kill Bill), „Омразените осуммина“ (The Hateful Eight) и „Си беше еднаш во Холивуд“ (Once Upon a Time in Hollywood).**
Во текот на неговата богата кариера, Медсен остави печат со харизматични, но мрачни и опасни ликови, кои го направија култна фигура во Холивуд. Неговиот препознатлив глас, став и мистериозен шарм го издвоија како еден од омилените актери на Тарантино.
Во заедничката изјава од неговите менаџери и публицистката, се наведува дека последните две години тој активно работел на неколку независни филмови, меѓу кои се „Патот на воскресението“, „Концесии“ и „Кујната за јужните домаќинки“. Подготвувал и издавање на книга под наслов „Солзи за мојот татко: Мисли и песни од одметници“.
Канцеларијата на шерифот на округот Лос Анџелес потврди дека нема сомневање за насилна смрт, а случајот е затворен како природна причина – срцев удар.
Медсен има над 346 филмски и телевизиски улоги, според IMDb, што го прави еден од најпродуктивните актери во индустријата. Тој беше брат на глумицата Вирџинија Медсен, трипати оженет и татко на седум деца – едно од кои почина пред неколку години.
Светот на филмот изгуби еден од своите најинтензивни и уникатни таленти.
