Морничав скандал кој изгледа како сценарио од филмски трилер ја потресе Европа, откако германскиот гигант за бебешка храна „ХиПП“ (HiPP) стана цел на сурова криминална уцена. Во тегла купена во Австрија бил пронајден смртоносен отров за стаорци, што активираше црвен аларм кај родителите ширум регионот.
Од компанијата потврдија дека се жртва на безмилосен уценувач кој испратил порака до нивното седиште во Германија. Веднаш по заканата, пријавен е случај на контаминирана тегла од 190 грама со вкус на морков и компир. Полицијата во австриски Бургенланд потврди: содржината била позитивна на отров, што значи дека конзумацијата може да биде кобна по живот!
Слични инциденти веќе се регистрирани во Чешка и Словачка, а иако официјално се тврди дека манипулацијата се случила надвор од фабриките, паниката се шири брзо.
Иако државните инспекторати во некои соседни земји смируваат дека нема директна опасност, хрватскиот ланец SPAR не сакаше да ризикува и целосно го повлече целиот асортиман на „ХиПП“ од своите полици.
„Станува збор за надворешна криминална манипулација врз која немаме влијание. ХиПП е жртва на уцена,“ соопштија од компанијата во официјалното писмо до родителите.
Компанијата упати итно предупредување до сите родители. Пред да му дадете храна на вашето бебе, задолжително направете ги овие три чекори:
- Притиснете го капакот: Ако средината се вдлабнува под палецот, не ја користете теглата!
- Слушнете го звукот: При првото отворање мора да се слушне јасен звук на „клик“.
- Мирис и изглед: Било каков непријатен мирис или промена на бојата е знак за опасност.
Истрагата е во тек, а полицијата трага по уценувачот кој се дрзна да ги стави најмилите во смртна опасност. Родители, бидете максимално внимателни!
