Кумановската полиција стави крај на една опасна авантура на две тркала која можеше да заврши фатално. Млад кумановец, без ниту еден ден возачки стаж во својата книшка, седнал на мотор и демонстрирал „храброст“ која директно го однесе зад решетки.
Инцидентот се случил на 17 април на фреквентната улица „Народна револуција“. Полициски тимови при рутинска контрола го пресретнале 21-годишниот С.П., кој управувал мотоцикл марка „Џонвеј“. При проверката, службениците останале затечени – младиот возач воопшто не поседувал возачка дозвола, а неговото однесување во сообраќајот било сè само не безбедно.
Иако многумина мислат дека возењето без дозвола е обична казна, овојпат полицијата оди со „тешка артилерија“. Против младиот С.П. не се поднесува обична глоба, туку кривична пријава која може да му го промени животот.
„По целосно документирање на настанот, лицето ќе одговара за кривично дело ‘безобѕирно управување на моторно возило’ по член 297-а од Кривичниот законик,“ потврдија од СВР Куманово.
Оваа законска одредба се применува само во екстремни случаи кога возачот со своето движење сериозно го загрозува животот на пешаците и другите учесници во сообраќајот. Со овој потег, кумановската полиција испраќа јасна порака: улиците не се патека за трки, а за непочитување на законот се оди директно на суд!
Останува прашањето – дали оваа лекција ќе биде доволна за младите возачи да сфатат дека „адреналинот“ на две тркала без дозвола има многу висока цена?
