Катастрофа била избегната рано утрово во прилепското село Бонче, откако силниот ветер го пренел пожарот кон населеното место, а огнената линија се приближила до куќите, соопшти директорот на Дирекцијата за заштита и спасување, Стојанче Ангелов.
Пожарот околу 4 часот се спуштил кон долот над селото, при што ситуацијата станала исклучително сериозна. Во гаснењето биле ангажирани доброволни пожарникари од Битола и Кочани, а дополнително била побарана помош од екипи од Прилеп и Кавадарци.
„Благодарение на храбрите пожарникари од Битола и Кочани, селото беше спасено“, изјавил Ангелов.
Теренот бил исклучително тежок, со ридови и висока вегетација, додека огнената линија била долга. Во интервенцијата учествувале и доброволци од Битола, од кои дел се наголтале чад.
Според Ангелов, без навремената интервенција огнот можел да помине низ селото, каде има повеќе од 50 куќи и живеат повеќе од десет лица, меѓу кои и мајка со бебе.
Сериозно и кај Палиград
Критична е состојбата и кај селото Палиград во општина Студеничани. Пожарот таму повеќепати бил ставен под контрола, но повторно се активира поради тешкиот терен, високите температури и силниот ветер.
На терен се ангажирани професионални пожарникари од Скопје, возило „Пинцгауер“ на ДЗС и три „ер трактори“.
Активни пожари има и на териториите на Маврово-Ростуше и Кичево.
Ангелов повторно упати апел до граѓаните да бидат крајно внимателни, предупредувајќи дека една искра може да предизвика голема катастрофа.
