Пратка со неверојатни 324 килограми и 474 грама марихуана била сокриена во бали со пресувана рециклирана хартија, а случајот отвори истрага за организирана криминална мрежа која, според обвинителството, делувала меѓу Македонија, Грција и Турција.
Основното јавно обвинителство за гонење на организиран криминал и корупција отвори истрага против едно лице, на кое во меѓувреме му е определен 30-дневен притвор.
Според обвинителството, осомничениот во периодот од февруари до 14 август годинава, заедно со уште тројца осомничени против кои постапка се води во Грција, учествувал во организација на набавка, чување и транспорт на марихуаната, со намера таа да биде продадена и пуштена во промет.
Камион и приколка набавени за транспортот
Кон крајот на февруари осомничениот набавил товарно возило, а на почетокот на март и приколка. Потоа организирал транспорт на пресувана рециклирана хартија од Македонија кон Турција, со планирана рута преку Бугарија.
Откако ги завршил царинските формалности, на 8 март го напуштил македонскиот граничен простор, но наместо да продолжи кон Турција, се упатил кон Грција.
Возилото и приколката биле оставени на изнајмен затворен плац во Солун, каде што осомничениот се сретнал со двајца лица опфатени со постапка во Грција. Таму бил договорен натамошниот транспорт на дрогата, која требало да биде сокриена во товарот со рециклирана хартија.
Според истрагата, во периодот од 11 до 14 август, двајца од осомничените, заедно со други засега непознати лица, ја сокриле марихуаната во претходно направени отвори во балите со хартија.
Акцијата „Вардарис“ ја открила пратката
Случајот бил откриен на 14 август, во рамките на акцијата „Вардарис“, кога грчката полиција привела двајца осомничени и извршила претрес на изнајмениот плац.
Таму била пронајдена приколката, од која претходно биле отстранети регистарските ознаки. При претресот, во четири палети во задниот дел од приколката и уште четири палети пред нив биле пронајдени вкупно 324 килограми и 474 грама марихуана.
Македонското обвинителство проценило дека постои опасност осомничениот да избега, да влијае врз соучесници и сведоци или да го повтори кривичното дело.
Поради тоа, до судија на претходна постапка при Основниот кривичен суд Скопје бил доставен предлог за определување притвор.
Судијата го прифатил предлогот и на осомничениот му определил 30 дена притвор, додека истрагата за целиот случај и лицата поврзани со меѓународната мрежа продолжува.
