Страшен случај во мексиканската сојузна држава Нуево Леон ја потресе јавноста, откако инфлуенсерката Синтија Абигејл Тамез Ривера, позната како Синди Тамез, нејзиниот партнер и нејзините три деца беа пронајдени мртви на две различни локации во Монтеморелос.
Според досегашната истрага, главната верзија што ја разгледува Обвинителството во Нуево Леон е дека Тамез можеби го убила партнерот и трите деца, а потоа си го одзела животот. Сепак, истрагата сè уште трае и конечните околности не се целосно утврдени.
На 30 септември телата на Тамез и нејзиниот најмал син биле пронајдени во автомобил во Монтеморелос. Потоа, во семејниот дом, на неколку улици од првата локација, биле откриени и телата на нејзиниот партнер Леодегарио Моја и другите две деца.
Во истрагата особено значење имаат балистичките анализи. Обвинителството соопштило дека првичните резултати ги поврзуваат двете места каде што биле пронајдени телата, а кај Тамез било пронајдено и огнено оружје.
Дополнително внимание предизвика нејзината последна објава на социјалните мрежи, објавена непосредно пред трагедијата. Во неа имало вознемирувачка порака која подоцна станала дел од информациите што се разгледуваат околу случајот.
Мексиканските медиуми објавија и дека во часовите пред трагедијата во домот на семејството наводно имало собирање и дека соседите слушале гласна музика. Сепак, точниот тек на настаните и мотивот сè уште се предмет на истрагата.
Случајот предизвика огромно внимание во Мексико, додека истражителите продолжуваат да ги анализираат доказите за да утврдат што точно се случило во последните часови од животот на петчленото семејство.
