Бројот на жртви во тешката поморска несреќа што се случи крај Сплит се зголеми откако нуркачките тимови го извлекоа телото на четвртата жртва од потонатата јахта, потврдија хрватските медиуми.
Несреќата се случила вчера околу пладне во подрачјето на Сплитска врата, каде дошло до судир помеѓу патнички катамаран и јахта под странско знаме. По силниот удар, јахтата со осум лица на бродот потонала на голема длабочина, додека катамаранот продолжил со пловидба по инцидентот.
Според официјалните податоци, катамаранот бил на редовна линија Сплит – Хвар и превезувал 118 патници и седум членови на екипажот. Јахтата, која била изнајмена преку чартер и пловела под француско знаме, имала осум лица на бродот во моментот на судирот.
Извештајот за несреќата пристигнал во Сплитската пристанишна управа околу 11:34 часот, по што веднаш била активирана голема спасувачка операција. Во акцијата биле вклучени сите расположливи бродови на пристанишната управа, полициски и поморски единици, како и служби за итна медицинска помош, меѓу кои и хеликоптерска поддршка.
Потонатата јахта била лоцирана на длабочина од 50 до 60 метри со помош на дрон на хрватската морнарица, по што во водата биле спуштени нуркачки тимови кои ја продолжиле потрагата по исчезнатите лица. Токму во таа фаза било пронајдено и извлечено телото на четвртата жртва.
Капетанот на Сплитската пристанишна управа изјави дека во своето 35-годишно искуство не се соочил со слична трагедија, нагласувајќи дека станува збор за исклучително тешка и сложена операција за спасување и потрага.
Иако во првичните информации се споменуваше едрилица, подоцна било појаснето дека станува збор за јахта која во моментот на несреќата пловела на мотор, а не под едра. Според надлежните, и двете пловила имале важечка документација и биле уредно регистрирани.
Во тек е детална истрага за да се утврдат точните околности под кои дошло до судирот во една од најфреквентните морски зони кај Сплит. Државното обвинителство ќе одлучи дали остатоците од потонатата јахта ќе бидат извлечени од морето како дел од доказниот материјал.
