Несекојдневен случај што ја потресе американската јавност се случил во сојузната држава Аризона, каде 18-месечно дете, кое било официјално прогласено за починато по несреќа во базен, неколку часа подоцна било пронајдено живо во просторија што служи како болничка мртовечница.
Според полициските документи, кои неодамна беа објавени, иако настанот се случил во февруари, детето било пронајдено со лицето надолу во базен во дворот на семејниот дом за време на прослава по повод Супер Боул.
Првиот повик до службите за итна помош бил упатен околу 17:30 часот, откако мајката забележала дека нејзиниот син се наоѓа во водата. Роднините веднаш започнале со реанимација сè до пристигнувањето на медицинските екипи.
Детето било пренесено во болницата „Мерси Гилберт“, каде во 18:20 часот лекар го прогласил за починато.
Сепак, според полицискиот извештај, неколку присутни службеници забележале дека детето и пред и по прогласувањето на смртта покажувало знаци на живот, меѓу кои и тешко дишење. Во еден момент медицинска сестра извикала дека чувствува пулс, но лекарот останал на својата одлука.
Во документите се наведува дека кога еден полицаец го предупредил докторот дека можеби сè уште има пулс, тој му одговорил дека тој е лекарот и дека треба да му биде дозволено да ја извршува својата работа. По прогласувањето на смртта, дел од медицинските сестри ја напуштиле просторијата видно вознемирени.
Речиси шест часа подоцна, околу 23:52 часот, транспортер од Канцеларијата на судскиот лекар пристигнал во болницата за да го преземе телото. Тогаш било утврдено дека детето дише и има пулс.
Веднаш било организирано итно префрлање со медицински хеликоптер во детската болница во Финикс, каде дополнителните испитувања покажале оштетување на мозокот. Според семејството, детето ќе има потреба од доживотна медицинска нега.
Родителите најавиле дека ќе покренат тужба против лекарот и болничката мрежа „Дигнити Хелт“, сметајќи дека биле направени сериозни пропусти во лекувањето и проценката на состојбата на нивното дете.
Во меѓувреме, обвинителството во округот Марикопа го разгледува целиот случај, вклучително и можноста против родителите да биде покрената постапка поради сомнеж за небрежност. Истражителите навеле дека во домот била почувствувана силна миризба на марихуана, а било утврдено и дека имало отворени врати преку кои детето можело без надзор да стигне до базенот.
Од болницата соопштија дека е спроведена детална внатрешна проверка на целиот случај, но поради заштита на приватноста на пациентот не откриваат дополнителни информации.
