Најмалку шест лица го загубија животот во тешка авионска несреќа во Бразил, откако два хеликоптери се судриле во воздух над Рио де Жанеиро, пред да се урнат во урбана зона на градот.
Трагедијата се случила над квартот Рекреио дос Бандирантес, по што двете летала паднале на паркинг во близина на автосалон во западниот дел од градот. При ударот избувнал силен пожар, а биле оштетени околу 20 паркирани возила, што дополнително ја зголемило драматичноста на настанот.
Според првичните информации од противпожарните служби, сите шест жртви се наоѓале во двата хеликоптери, без преживеани. На терен веднаш интервенирале пожарникарски и спасувачки екипи, кои се бореле со огнот и обезбедувале периметар околу местото на падот.
Бразилската полиција соопшти дека се проверува идентитетот на патниците, откако името на американскиот пејач и комичар Оливер Три се појавило на списокот на патници на еден од летовите. Сепак, засега официјалната идентификација на жртвите сè уште не е завршена.
Информациите дополнително се усложнуваат со фактот дека артистот неодамна бил активен на социјалните мрежи, каде објавил видео од Бразил, што отвори бројни дилеми и шпекулации додека истрагата е во тек.
Локалните медиуми објавија драматични снимки на кои се гледа густ чад како се издига над местото на несреќата, додека повеќе автомобили се целосно зафатени од пламен.
Во меѓувреме, надлежните служби најавија детална истрага за причините на судирот во воздух, додека воздухопловните експерти ќе ги анализираат сите технички и оперативни фактори.
Според податоците од бразилскиот Центар за истражување и превенција на воздухопловни несреќи, ваквите инциденти не се реткост во земјата, каде минатата година биле регистрирани 153 воздухопловни несреќи со 62 загинати лица.
