Околу 40 патници го напуштиле крузерот „MV Hondius“, погоден од смртоносната епидемија на хантавирус, за време на застанување на островот Света Елена, соопштија холандските власти. Меѓу нив била и сопругата на холандски патник кој почина – таа го напуштила бродот со телото на својот сопруг, а потоа се качила на лет за Јужна Африка, каде што се онесвестила и починала на аеродромот во Јоханесбург.
Компанијата што управува со крузерот претходно негирала дека други патници се истовариле на Света Елена, но новите информации откриваат дека десетици луѓе ја напуштиле бродската изолација. Властите во Јужна Африка и Европа сега се обидуваат да ги пронајдат сите контакти на овие патници.
Паниката се прошири и во Швајцарија – еден маж кој се истоварил на Света Елена развил симптоми и бил позитивен на хантавирус по враќањето дома. Тој е сместен во изолација во Цирих, со можност за карантин до 45 дена.
Според компанијата, британски државјанин бил евакуиран од островот Вознесение и префрлен во Јужна Африка, а уште три лица – меѓу кои и лекарот на бродот – биле евакуирани кај Зелен ’Рт и со авион испратени на лекување во Европа.
Досега три патници починаа, а неколку други се разболеа. Хантавирусот, кој има стапка на смртност од околу 40%, предизвикува сериозна меѓународна загриженост. Со инкубација до осум недели, експертите предупредуваат дека нови случаи може да се појават во наредните денови.
