Силно невреме со пороен дожд, грмотевици и силни налети на ветер во четвртокот вечерта зафати делови од Далмација во Хрватска, предизвикувајќи поплавување на патишта и проблеми во сообраќајот.
Најинтензивно било во поширокото подрачје на Шибеник. Во Рогозница за кратко време наврнало големо количество дожд, а водата ги поплавила коловозите. Невремето било проследено со силен ветер и чести молњи.
Слична состојба била регистрирана и во Бродарица, каде поројниот дожд предизвикал собирање вода на патиштата. Намалената видливост дополнително го отежнувала движењето на возилата.
Невремето во текот на вечерта продолжило да се движи кон југ. Силен дожд го зафатил и подрачјето на Марина, а подоцна дожд и повремени грмотевици пристигнале и во Сплит.
Хрватскиот Државен хидрометеоролошки завод издал жолто предупредување за сплитскиот регион поради опасност од локално силни поројни врнежи и грмотевици. Предупредувањето важи и за петок, 18 септември, кога повторно се очекуваат пообилни врнежи.
На возачите им се препорачува дополнителна внимателност поради влажните и локално поплавени коловози.
