Шест лица се уапсени во Србија во рамки на голема меѓународна полициска акција насочена кон сузбивање на онлајн експлоатацијата на малолетници и дистрибуција на порнографски материјали со деца.
Според српското Министерство за внатрешни работи, осомничените се товарат за кривични дела поврзани со прикажување, набавување и поседување порнографски материјал, како и за експлоатација на малолетници за порнографски цели.
Истрагата покажала дека осомничените користеле лажни профили на социјалните мрежи, претставувајќи се како малолетни девојчиња за да воспостават комуникација со други лица, лажно претставувајќи се како нивни врсници.
Во акцијата се уапсени шест лица, меѓу кои руски државјанин и државјани на Србија од повеќе градови. Според наводите на полицијата, тие подолг временски период преземале, чувале и дистрибуирале материјали поврзани со сексуална експлоатација на деца преку интернет.
Од српското МВР соопштија дека акцијата е спроведена како дел од поширока меѓународна соработка во борбата против онлајн злоупотребата на малолетници и откривањето на мрежи кои се занимаваат со ваков вид криминал.
Надлежните институции продолжуваат со истрагата, а се очекува да бидат утврдени сите околности и евентуалната поврзаност на осомничените со други лица или криминални групи.
