Бугарската музичка сцена е завиена во црно по веста за смртта на поп-фолк пејачот Никола Праматаров, попознат под своето уметничко име Нисана. Тој починал на 43-годишна возраст, а информацијата предизвика голем број реакции кај неговите обожаватели, колеги и пријатели.
Тажната вест ја потврди неговото семејство, кое се соочува со еден од најтешките моменти во својот живот. Неговата мајка, поп-фолк пејачката Каролина, преку емотивна објава на социјалните мрежи изрази благодарност до сите кои испратиле пораки со сочувство, поддршка и утеха по загубата на нејзиниот син.
Според првичните информации, Никола бил пронајден без знаци на живот во својот дом. Во овој момент надлежните институции сè уште немаат објавено официјални детали за причината за смртта, поради што околностите околу трагичниот настан засега остануваат непознати.
Никола Праматаров – Нисана беше едно од препознатливите имиња на бугарската поп-фолк сцена. Најголема популарност стекна во доцните деведесетти години и во првите години од новиот милениум, кога со своите песни успеа да изгради препознатлив стил и да освои голем број фанови.
Неговото заминување остави тага кај многумина кои со години ја следеа неговата музичка кариера. Повеќе информации за комеморацијата и погребот, според семејството, ќе бидат соопштени дополнително.
