Голема тага ја потресе јавноста по трагичната сообраќајна несреќа што во саботата наутро се случи на автопатот А1 во близина на Загреб, во која животот го загуби 18-годишна девојка. Иако имала само 18 години, таа веќе била активен член на Доброволната противпожарна служба (ДВД) Крашиќ, каде што била ценета по својата посветеност и желба да им помага на другите.
Несреќата се случила на делницата меѓу Јастребарско и Доња Зденчина. Според официјалните информации, девојката управувала автомобил „БМВ“, кога поради недоволно растојание зад возилото пред неа изгубила контрола врз автомобилот.
Во обид да избегне директен судир, нагло го свртела возилото, при што со предниот дел од автомобилот удрила во „Опел Астра“ со унгарски регистарски таблички, управуван од 56-годишен државјанин на Унгарија. Од силниот удар, БМВ-то излетало од коловозот, удрило во заштитната ограда, а потоа и во две дрвја покрај патот.
За жал, младата девојка им подлегнала на тешките повреди и починала на местото на несреќата.
Истрагата покажала дека таа управувала со возилото без положен возачки испит, што е една од клучните околности кои се земаат предвид при утврдувањето на причините за трагедијата.
Нејзината смрт предизвика силни емоции во локалната заедница, а особено меѓу нејзините колеги пожарникари, кои преку емотивни пораки се простија од неа.
„Со неизмерна тага и болка се збогуваме од нашата млада колешка. Иако нејзиниот животен и противпожарен пат беше прерано прекинат, нејзината благородност, несебичност и подготвеност секогаш да им помогне на другите ќе останат врежани во нашите сеќавања. Почивај во мир. Пожарникарите не умираат, тие само заминуваат на вечна стража“, порачаа нејзините колеги.
Со официјално соопштение од младата сограѓанка се прости и Општина Крашиќ, која изрази длабоко сочувство до нејзиното семејство, истакнувајќи дека станува збор за голема загуба за целата заедница.
Според загребачката полиција, несреќата се случила околу 9 часот наутро на автопатот А1, кога девојката се движела по левата сообраќајна лента во правец кон североисток. Надлежните ја завршија истрагата, а официјалните наоди укажуваат дека неприлагоденото растојание зад возилото пред неа и управувањето без возачка дозвола биле клучните фактори што довеле до оваа трагедија, која одзеде уште еден млад живот на патиштата.
