Две млади момчиња, штотуку полнолетни, ги загубија животите во тешка сообраќајна несреќа што се случила во Бања Ковиљача, Србија, на 5 јули околу 04:00 часот наутро.
Според информации објавени од српски „Телеграф“, во несреќата загинале возачот на автомобилот „Голф 4“, Марко Јанковиќ, и неговиот сопатник Богдан Максимовиќ.
Возилото се движело од правец на Лозница кон Бања Ковиљача, кога поради, како што се наведува, неприлагодена брзина, излетало од коловозот и директно удрило во дрво. Ударот бил исклучително силен, при што автомобилот бил целосно уништен и речиси непрепознатлив.
На местото на несреќата веднаш пристигнала екипа на Брза помош, но лекарите можеле само да ја констатираат смртта на двете млади лица.
Поради тежината на ударот и деформацијата на возилото, интервенирале и пожарникари кои морале да го сечат автомобилот за да ги извлечат телата на загинатите момчиња.
Според првичните информации од истрагата, 18-годишниот возач поседувал пробна возачка дозвола, додека точните околности под кои дошло до несреќата дополнително се утврдуваат.
Со случајот раководи Основното јавно обвинителство во Лозница, кое наредило обдукција на телата, како и понатамошна истрага за сите околности поврзани со трагедијата.
