Во изминатите 24 часа на подрачјето на Штип се регистрирани два сериозни случаи на измама врз повозрасни лица, при што сторителите користеле добро позната, но исклучително сурова шема – лажно претставување како лекари и измислени тешки сообраќајни несреќи на блиски членови од семејството.
Првиот случај бил пријавен на 30.01.2026 година во 11:30 часот во СВР Штип од 96-годишен маж. Тој изјавил дека бил контактиран телефонски од лице кое се претставило како лекар. Лажниот „доктор“ му соопштил дека неговата ќерка доживеала тешка сообраќајна несреќа, при што се здобила со сериозни скршеници и дека итно мора да биде оперирана. За операцијата, како што му било кажано, било неопходно веднаш да се обезбеди поголема сума пари.
Во состојба на вознемиреност и страв за животот на својата ќерка, оштетениот прифатил да помогне. По претходен договор со измамниците, тој од балконот на својот дом фрлил 3.500 евра, кои биле преземени од лице што чекало под објектот, а потоа брзо го напуштило местото. Подоцна, откако успеал да стапи во контакт со својата ќерка и утврдил дека таа е жива и здрава, сфатил дека станал жртва на измама.
Вториот случај бил пријавен истиот ден во 16:30 часот од 77-годишна жена од Штип. Таа пријавила дека била измамена на идентичен начин. И во овој случај, телефонски ја контактирало лице кое се претставило како лекар и ѝ соопштило дека нејзината ќерка е тешко повредена во сообраќајна несреќа и дека мора итно да се изврши операција.
По договор со сторителите, жената од балконот на својот дом предала 3.000 евра, 30.000 денари и златен накит на женско лице кое дошло да ги преземе парите. По преземањето, лицето го напуштило местото на настанот. Како и во првиот случај, подоцна станало јасно дека станува збор за измама, откако оштетената утврдила дека нејзината ќерка не била повредена.
Од Министерството за внатрешни работи информираат дека во двата случаи се преземаат интензивни мерки и активности за целосно расчистување на настаните и за откривање на сторителите, а апелираат граѓаните, особено повозрасните, да бидат крајно внимателни и да не подлегнуваат на вакви телефонски повици кои играат на емоции и страв.
