Млад брачен пар во Полска доживеал вистински шок за време на реновирање на својот нов дом, откако работници откриле човечки остатоци закопани во дворот на имотот.
Морничавото откритие било направено додека градежна механизација работела на уредување на пристапниот пат кон куќата. По пронаоѓањето на првите остатоци, на местото веднаш пристигнале истражни органи, кои започнале детална истрага.
Според информациите од обвинителството, биле пронајдени вкупно 29 фетуси, како и медицински отпад, меѓу кој и материјали што вообичаено се користат за чување примероци за лабораториски анализи.
Имотот претходно бил во сопственост на 57-годишна патологка, која подоцна била уапсена. За време на истрагата таа признала дека на имотот закопувала медицински отпад.
Истражителите извршиле претрес на поширокото подрачје околу куќата во потрага по дополнителни докази, а биле одземени и медицинска документација и други материјали поврзани со случајот.
Локалните жители ја опишуваат поранешната сопственичка како повлечена личност која ретко комуницирала со соседите. Случајот предизвика огромно внимание во јавноста, а истрагата продолжува со цел да се утврдат сите околности поврзани со пронајдените остатоци.
Доколку биде прогласена за виновна, осомничената може да се соочи со повеќегодишна затворска казна.
