Суд во Калифорнија го прогласи за виновен тренер на кучиња кој се соочува со затворска казна, откако поради негрижа починале 11 животни оставени во прегреано комбе.
Според истрагата, кучињата биле сместени во метални кафези во затворено возило за време на екстремно високи температури, без соодветна вентилација и грижа. Како последица на топлината и недостигот на воздух, сите животни починале од топлотен удар.
Обвинителството утврдило дека не станувало збор за единечен пропуст, туку за сериозно занемарување на животните. Дополнително, по нивната смрт биле направени обиди да се прикријат доказите, вклучувајќи и кремирање на кучињата, со што истрагата била дополнително отежната.
Судот оцени дека станува збор за исклучително тежок случај на суровост кон животни и го прогласи обвинетиот за виновен по повеќе точки од обвинението. Неговата соработничка, пак, е осудена за помагање во прикривање на доказите.
Случајот предизвика силни реакции во Калифорнија, каде организациите за заштита на животните побараа построги контроли врз лицата и центрите што се грижат за домашни миленици, како и построги правила за нивниот транспорт, особено за време на екстремно високи температури.
