34-годишна жена предизвикала тешка сообраќајна несреќа во Врбовац откако сред бел ден седнала зад волан под силно дејство на алкохол, додека во автомобилот ги превезувала и своите деца.
Несреќата се случила околу 14:20 часот, кога жената при нагло свртување изгубила контрола врз возилото. Автомобилот најпрво удрил во насип и бетонски ѕид, а потоа се превртел на покрив покрај патот.
Според полицијата, алкотестот покажал дури 2,13 промили алкохол во организмот. Во возилото се наоѓале и децата на возачката, кои за среќа биле правилно врзани во детски седишта и поминале со полесни повреди.
Тие биле пренесени во болница за укажување помош, додека против мајката ќе биде поднесена пријава за повеќе сообраќајни прекршоци. Полицијата дополнително истражува и можно кривично дело поврзано со загрозување на правата и безбедноста на децата.
