Основниот суд во Гевгелија му изрече доживотна казна затвор на Петар Станковски (40) од Богданци за убиството на неговата мајка, случај кој ја потресе јавноста.
Станковски беше обвинет за кривично дело „убиство на свиреп начин при семејно насилство“, а пресудата е донесена откако тој ја признал вината пред судот.
Од Основниот суд Гевгелија информираа дека станува збор за првостепена пресуда, а на обвинетиот му е продолжен притворот сè до нејзината правосилност.
Трагичниот настан се случил на 11 јануари годинава во Богданци, во станот каде што мајката и синот живееле како потстанари. Според обвинението на Основното јавно обвинителство Гевгелија, меѓу нив избила расправија поврзана со лекувањето на обвинетиот.
Во еден момент ситуацијата ескалирала, по што, според обвинението, Станковски зел кујнски нож и ѝ нанел повеќе повреди на својата мајка.
Откако ножот се скршил, тој продолжил со нападот користејќи други предмети од домаќинството, по што жената починала како последица на здобиените повреди.
По настанот, следниот ден обвинетиот самиот се пријавил во полиција и го пријавил случајот.
Истрагата и судската постапка го квалификуваа делото како особено тешко, поради начинот на кој било извршено и фактот дека жртвата била член на најблиското семејство.
Со изрекувањето на најстрогата затворска казна, судот испрати порака дека најтешките форми на семејно насилство и брутални убиства ќе бидат санкционирани со највисоки казни предвидени со закон.
