Денеска со голема тага беше објавено дека ненадејно почина д-р Виктор Исјановски, еден од најистакнатите македонски психијатри и поранешен директор на Здравствен дом Скопје во периодот од 2019 до 2024 година.
Роден во Скопје на 21 јули 1978 година, Исјановски уште од рана возраст покажал голема љубов кон медицината. Дипломирал на Медицинскиот факултет во Скопје во 2003 година, а дел од своето образование го продолжил на Универзитетот во Мајами, Калифорнија.
Својата професионална кариера ја започнал во 2004 година во Казнено-поправната установа Идризово, по што од 2006 година станал дел од ЈЗУ „Психијатриска болница Скопје“. Веќе во 2007 година ја завршил специјализацијата по психијатрија, а во 2018 бил назначен за раководител во оваа институција.
Со исклучителна посветеност, тој магистрирал на Медицинскиот факултет со просек 10, а својот научен труд на тема „Улогата на некои ризик фактори во етиопатогенезата на шизофренијата“ го одбранил со највисоки оценки. Покрај тоа, бил избран и за асистент на Катедрата по психијатрија при Психијатриската клиника во Скопје, оставајќи силен белег во академската заедница.
Д-р Виктор Исјановски зад себе остава сопруга и две деца. Неговата ненадејна смрт претставува огромна загуба за медицинската заедница, колегите и сите што имаа чест да го познаваат.
Големината на неговата работа и посветеноста кон пациентите ќе останат запаметени како трајно наследство.
