Полициските службеници го лишиле од слобода Б.Г. (45) од Дебар, откако неговата сопруга пријавила дека била физички нападната во семејниот дом. Според информациите, 36-годишната жена била изложена на насилство и закани, што веднаш предизвикало реакција од полицијата.
Нападнатата сопруга побарала лекарска помош во Општата болница со проширена дејност, каде што и била укажана соодветна медицинска услуга.
Полицијата информира дека по целосно документирање на случајот ќе следува соодветна кривична пријава против осомничениот.
Она што дополнително ја загрижува јавноста е фактот дека ова е веќе петти случај на семејно насилство годинава на подрачјето на општините Дебар и Центар Жупа, кои се под надлежност на дебарското одделение.
Случајот повторно ја отвора темата за зачестеното семејно насилство и потребата од навремена интервенција и превенција, за да се спречат трагични последици.
