Дваесет и петгодишната активистка Ана Лидке поднесе кривична пријава до израелските власти, тврдејќи дека била сексуално нападната за време на престојот во израелски притвор по нејзиното приведување од хуманитарната флотила што пловела кон Појасот Газа. Израелската затворска служба ги отфрла сите наводи.
Според нејзиното сведоштво, за време на еден од претресите во притвор била изложена на сексуално насилство. Таа тврди дека чувари ја спречувале да повика помош и дека нападот се случил додека други службеници биле во близина.
Лидке изјави дека насилството врз учесниците на хуманитарната флотила имало за цел да ги заплаши и да ги обесхрабри да продолжат со својот активизам. Таа нагласи дека решила јавно да проговори за случајот за, како што вели, да не се премолчуваат ваквите наводи.
Нејзините адвокати поднеле официјална жалба и побарале темелна истрага за случајот. Во меѓувреме, израелските власти ги негираат обвинувањата.
Случајот повторно го отвори прашањето за постапувањето со притворениците. Во последните месеци, меѓународни организации и институции, меѓу кои и Обединетите нации, изразија загриженост поради наводи за сексуално насилство и малтретирање во притворски центри, а во неколку држави се водат одделни истраги поврзани со слични обвинувања.
