Во текот на само едно деноноќие, Министерството за внатрешни работи регистрирало дури девет случаи на семејно насилство низ државата, а седум лица завршиле во полициска станица. Во еден од случаите, лице било пренесено на лекување во Психијатриската болница во Демир Хисар.
Според информациите на МВР, серијата инциденти била евидентирана на 12 јули во повеќе градови и населени места низ Македонија, при што во повеќето случаи станува збор за физички напади, закани и агресивно однесување кон најблиските членови на семејството.
Во село во Валандовско, полицијата привела 26-годишен маж откако неговиот 51-годишен татко пријавил дека бил физички нападнат од својот син.
Во Радовиш, пак, зад решетки завршил 18-годишник, осомничен дека агресивно се однесувал кон својата мајка.
Нов случај бил регистриран и во скопската населба Ѓорче Петров, каде полициски службеници го лишиле од слобода 54-годишниот Т.М., кој, според пријавата, со остар предмет им се заканувал на сопругата и нивните деца.
Во Охрид, по семејна расправија во домот на нивните родители, приведени биле две лица – 59-годишен жител на Струга и 62-годишна охриѓанка. Според пријавеното, жената физички нападнала членови на семејството.
Во Штип, полицијата уапсила 30-годишен маж осомничен дека физички ја нападнал својата 24-годишна девојка.
Уште едно приведување било извршено во Кавадарци, каде 38-годишен маж бил лишен од слобода по пријава од неговиот татко дека агресивно се однесувал и фрлал предмети низ семејниот дом.
Во Македонски Брод бил пријавен случај во кој 45-годишен маж физички ја нападнал својата 50-годишна сестра. По целосното документирање на случајот ќе биде поднесена соодветна пријава.
Во Битола, две лица пријавиле дека добивале сериозни закани од нивни близок роднина, а полицијата презема активности за целосно расчистување на случајот.
Еден од посериозните случаи бил регистриран во Куманово, каде 55-годишна жена пријавила дека подолг период таа и нејзините деца биле изложени на физичко и психичко насилство од нејзиниот сопруг, кој често бил под дејство на алкохол.
По интервенцијата на надлежните, мажот бил пренесен во Психијатриската болница во Демир Хисар, а против него ќе биде поднесена соодветна пријава.
Последните податоци повторно го отвораат прашањето за семејното насилство како сериозен општествен проблем, а од МВР најавуваат дека против сите инволвирани лица ќе бидат преземени законски мерки по целосното документирање на случаите.
