Две товарни возила беа оштетени во пожар што ноќеска избувнал на плац во Битола, информира Министерството за внатрешни работи.
Според информациите, случајот бил пријавен утринава околу 03:40 часот, кога избувнал пожар на плац во сопственост на правно лице.
Во огнената стихија биле опожарени товарните возила „Фиат“ и „Ивеко“ со битолски регистарски таблички, сопственост на Н.С. од Битола.
Покрај возилата, пожарот зафатил и бандера со електрична инсталација, пред да биде локализиран од екипите на Територијалната противпожарна единица – Битола.
Во инцидентот нема повредени лица, а надлежните институции работат на утврдување на причините за избувнувањето на пожарот.
