Вечерва во населбата Кисела Вода се случила тешка сообраќајна несреќа кога такси управувано од возач кој, според очевидци, бил во видно алкохолизирана состојба, удрило во млада девојка на тротоар.
По ударот, возачот не застанал и продолжил да вози, удрил во паркирано комбе пред пиљарата „Шампионче“ и запрел пред градинката „Весели Цветови – Мимоза“, со сериозно оштетено возило.
Повредената девојка веднаш била пренесена во болница со помош на присутни граѓани и екипи на Итната медицинска помош. Таксистот е задржан, а полицијата извршила увид. Дополнителни информации за состојбата на девојката и околностите на несреќата се очекуваат од Министерството за внатрешни работи.
