Инфлуенсерка од Казахстан се здоби со изгореници откако преносен полнач (power bank) експлодирал во нејзината торба додека се подготвувала да ја напушти теретаната.
Безбедносните камери го снимиле моментот кога од торбата најпрво почнал да излегува густ чад, а само неколку секунди подоцна избувнал пламен непосредно покрај нејзиното лице. Огнот брзо ја зафатил косата и десната страна од телото.
27-годишната Дилјара Хамзина подоцна изјави дека во првите моменти не сфатила што се случува.
„Наеднаш слушнав експлозии и сфатив дека ми гори торбата. Се обидов веднаш да ја симнам од рамото“, раскажала таа.
Еден од вработените во теретаната веднаш реагирал и се обидел да го изгасне пожарот со противпожарен апарат. Откако првиот обид не успеал, торбата била изнесена надвор, каде што пламенот бил ставен под контрола.
На местото пристигнала и екипа на итната медицинска помош. Иако првично сметала дека повредите не се сериозни, инфлуенсерката се предомислила кога ги видела последиците во огледало.
Таа се здобила со изгореници на главата, лицето и десната страна од телото, а огнот ги зафатил косата, веѓите и трепките. По укажаната лекарска помош во центар за лекување изгореници, лекарите предложиле болничко лекување, но таа одлучила закрепнувањето да го продолжи дома.
Инцидентот повторно ја отвори темата за безбедното користење и складирање на литиум-јонските батерии во преносните полначи, кои при дефект или физичко оштетување можат да предизвикаат пожар или експлозија.
