Најмалку 16 лица загинаа, а повеќе од десетина се повредени во две одделни сообраќајни несреќи што се случија денеска во близина на Анталија и во покраината Бурдур во Турција.
Првата несреќа се случи во покраината Анталија, каде патнички автобус се преврте откако возачот не успеа да помине низ кривина на дождлив и маглив пат. Во несреќата загинаа најмалку девет лица, додека голем број патници се повредени. Повредените беа пренесени во најблиските болници, вклучувајќи ја Градската болница во Анталија, каде што се обезбедува итна медицинска нега.
Турскиот министер за правда, Џилмаз Тунч, најави дека е покрената истрага за несреќата и дека се назначени заменик-главен обвинител и двајца јавни обвинители за целосно расчистување на околностите. Гувернерот на Анталија, Хулуси Шахин, додаде дека временските услови во моментот на несреќата биле тешки, но потенцира дека на патот каде се случи несреќата не е дозволена голема брзина.
Во исто време, во покраината Бурдур, на патот Анталија-Испарта, се случи друга тешка сообраќајна несреќа. Два автомобили се судрија челно, при што загинаа седум лица, а петмина се повредени. Повредените се згрижени во болници, а патот беше повторно отворен по завршување на истрагата.
Министерот за внатрешни работи на Турција, Али Јерликаја, истакна дека двете несреќи „длабоко ја потресоа нацијата“ и упати сочувство до семејствата на загинатите, како и желби за брзо закрепнување на повредените. Истрагите за двете трагедии се во тек, а властите апелираат на внимателно возење и почитување на сообраќајните правила, особено во лоши временски услови.
