Унгарската полиција истражува шокантен случај во Будимпешта, каде 30-годишен болнички домар е осомничен за незаконско поседување човечки остатоци и можно сквернавење на посмртни останки. Според властите, осомничениот за време на испрашувањето признал дека консумирал човечко месо.
Истрагата започнала по дојава дека мажот чувал делови од човечки тела на работното место и во својот дом. При претресите, полицијата пронашла човечки коски, неколку черепи, потколеница, надлактица, човечки мозок, препарирани делови од кожа и лице, како и орган во тегла чијашто природа сè уште се утврдува.
Според истражителите, осомничениот бил заинтересиран за анатомија и патологија, а се сомнева дека дел од човечките останки ги набавувал преку работата во болница, додека други ископувал од напуштени гробишта во Унгарија и Словачка.
Полицијата наведува дека мажот не ја криел својата необична опсесија, туку за неа зборувал со семејството и пријателите, па дури и фотографирал дел од својата колекција.
По апсењето на 17 јуни, истражителите заплениле компјутери, мобилни телефони и други електронски уреди, а сите пронајдени човечки остатоци се испратени на форензичка анализа за да се утврди нивното потекло.
Осомничениот е ставен под кривичен надзор, а истрагата продолжува. Властите не ја исклучуваат можноста против него да бидат поднесени и дополнителни обвиненија, во зависност од резултатите од форензичките испитувања.
