Полицијата приведе 25-годишен жител на Штип кој е осомничен дека предизвикал пожар во близина на магистралниот пат Штип-Кочани, во период кога регионот се соочува со серија пожари и големи штети.
Според информациите од Министерството за внатрешни работи, полициски службеници од СВР Штип го затекнале Б.С. (25) во атарот на селото Долни Балван како пали сува трева меѓу коловозот и земјоделска нива.
Пожарот брзо се проширил, при што биле зафатени сува вегетација и бала детелина во сопственост на локален земјоделец. Осомничениот веднаш бил лишен од слобода, а за случајот бил известен и надлежен јавен обвинител.
Апсењето доаѓа по неколкуте пожари што во изминатите денови ја зафатија околината на Штип. Надлежните претходно изразија сомневање дека дел од пожарите можеби биле намерно предизвикани, а најновото приведување дополнително ги засили тие сомнежи.
Во меѓувреме, лицето кое беше повредено при обид да го изгасне пожарот кај својата викендица останува на лекување во Клиничката болница во Штип. Според лекарите, неговата состојба е стабилна, иако се здобил со изгореници од втор степен и вдишал поголема количина чад.
Надлежните институции повторно апелираат до граѓаните да не палат сува трева, стрништа и отпад на отворено, особено во услови на високи температури и засилен ветер.
Истрагата продолжува и треба да утврди дали приведениот е поврзан и со други пожари што неодамна избувнаа во штипскиот регион.
