Во Србија, во близина на Инѓија, е пронајдено тело на непознато лице скриено во буре, што веднаш ја засили мистеријата околу случај што веќе неколку дена ја тресе јавноста.
Иако идентитетот сè уште официјално не е потврден, дел од српските медиуми неофицијално наведуваат дека постои сомнеж дека станува збор за Александар Нешовиќ Баја, кој исчезна по пукање во ресторан во белградскиот кварт Сењак.
Полицијата во меѓувреме спроведува проверки и анализи за да се утврди точниот идентитет на пронајденото тело. Потрагата по исчезнатото лице траела повеќе денови, а во рамки на истрагата веќе се приведени повеќе лица, меѓу кои и високо позициониран полициски функционер кој подоцна бил разрешен.
Во акцијата за пребарување биле вклучени полициски единици, Жандармеријата, а подоцна и делови од Војската на Србија, при што теренот околу Јарковачкото Езеро бил детално прегледуван.
Според неофицијални информации од истрагата, се сомнева дека едно лице го извршило пукањето во ресторан, по што телото било преместено на друга локација, што дополнително ја комплицира целата ситуација.
Истрагата продолжува, а надлежните институции најавуваат дека ќе бидат објавени нови информации штом се потврдат сите факти.
