Германски суд го осуди 25-годишниот Емануел Р., син на германски милионер, на 11 години затвор поради бруталното убиство на неговата 76-годишна маќеа, Ивка Пешиќ, по потекло од Беране. Злосторството се случило во јуни минатата година во семејниот стан во Минхен.
Според обвинението, на трагедијата ѝ претходела жестока семејна расправија која избувнала по разговор за работи извршени на семејниот имот. Во еден момент, обвинетиот земал кујнски нож и ја нападнал маќеата, нанесувајќи ѝ повеќе убоди.
Нејзиниот сопруг, кој е татко на обвинетиот, се обидел да го спречи нападот, но бил оттурнат и повреден. Обвинителството наведува дека напаѓачот потоа продолжил со нападот додека жртвата лежела беспомошна.
Семејството на убиената изрази незадоволство од пресудата, оценувајќи дека 11 години затвор не се соодветна казна за тежината на злосторството.
Во текот на судскиот процес било утврдено дека кај обвинетиот биле пронајдени повеќе од 50 книги со нацистичка тематика, но судот заклучил дека нема доволно докази тие да биле мотив за злосторството или дека обвинетиот бил припадник на неонацистичка идеологија.
