Семејна драма со меѓусебни обвинувања за насилство се случила во Велес, каде што 43-годишен маж бил приведен откако неговата 72-годишна мајка пријавила дека физички ја нападнал во семејниот дом.
Според информациите од Министерството за внатрешни работи, полициски службеници од СВР Велес ноќеска околу 00:20 часот го лишиле од слобода С.С. (43) од Велес, постапувајќи по пријава поднесена од неговата мајка. Жената пријавила дека била физички нападната од својот син во нивниот дом.
Сепак, случајот добил дополнителна димензија откако било утврдено дека претходно и самиот С.С. поднел пријава против својата мајка. Тој навел дека таа подолг временски период вршела насилство врз неговиот малолетен син, а според неговите тврдења, на 16 јуни годинава физички го нападнала детето.
Поради сериозноста на наводите и присуството на малолетно лице во случајот, за настанот веднаш биле известени јавен обвинител и Центарот за социјални работи во Велес. Надлежните институции ќе ги испитуваат сите околности и ќе утврдуваат дали и во кој обем се точни обвинувањата изнесени од двете страни.
Од МВР информираат дека се преземаат дополнителни мерки за целосно расчистување на случајот, по што ќе бидат донесени соодветни законски одлуки.
