Со голема тага е потврдена смртта на прим. д-р Драган Христов, долгогодишен специјалист по ортопедска хирургија и еден од клучните лекари во болницата Аџибадем Систина.
Тој беше дел од тимот уште од 2010 година, кога започна со работа ортопедскиот оддел во болницата. Со своето професионално искуство и високо ниво на стручност, д-р Христов значајно придонесе за развојот и унапредувањето на ортопедската хирургија, поставувајќи стандарди што со години се следат.
Колегите и соработниците го паметат како исклучително посветен лекар, кој не само што лекувал пациенти, туку и активно учествувал во обука и развој на медицинскиот кадар. Неговата работа остави силен и траен белег во здравствениот систем.
Од болницата е изразена длабока благодарност за неговиот придонес, заедно со искрено сочувство до неговото семејство и блиските.
Неговото име ќе остане запаметено како симбол на професионализам и човечност во медицината.
