Трагичен случај од Австралија повторно го привлече вниманието кон ретката алергија на месо што може да се развие по каснување од крлеж.
Петнаесетгодишниот Џереми Веб починал во 2022 година, откако на кампување изел говедска колбасица. Во почетокот, причината за смртта била заведена како последица од астма, но по дополнителна истрага, судскиот вештак утврдил дека момчето починало од анафилактичен шок предизвикан од алфа-гал синдром, ретка алергија на месо од цицачи што може да се развие по каснување од одредени видови крлежи.
Според британскиот BBC, ова се смета за првиот познат смртен случај во светот поврзан со оваа алергија.
Мајката на Џереми вели дека со години се сомневала дека нејзиниот син има проблем со консумирањето месо, но никогаш не добиле официјална дијагноза. Таа денес активно работи на подигнување на свеста за оваа состојба.
Експертите објаснуваат дека симптомите можат да варираат – од осип, стомачни болки и повраќање, па сè до животозагрозувачки анафилактичен шок. Најчесто алергијата се поврзува со каснување од одредени видови крлежи, а случаи се регистрирани на повеќе континенти.
Лекарите нагласуваат дека ова е ретка состојба, но советуваат лицата кои по каснување од крлеж забележуваат необични реакции по консумирање месо да побараат лекарски совет и соодветни испитувања.
