Утрово, повеќе од 100 лица пристигнаа на Гавдос со два чамци, а се очекува бројката да се зголеми поради пристигнување на други чамци кои се во процес на регистрација.
На Крит, во затворениот привремен центар, веќе има над 1.100 мигранти кои пристигнале во изминатите денови, а синоќа дошло и до инциденти меѓу нив, поради долгото затворање.
Според официјалните податоци од грчката крајбрежна служба, само во петокот биле спасени 372 мигранти во морето кај Гавдос.
Поради зголемените бранови од северна Африка, Министерството за миграција и азил донесе вонреден амандман кој суспендира поднесување барања за азил од лица што нелегално влегле во Грција, мерка што трае три месеци.
Министерот Танос Плеврис истакна дека амандманот дава резултати: во првите десет дена од септември на Крит пристигнале само 75 мигранти, додека пред воведувањето на мерката во јули пристигнале 2.642 лица за една седмица.
Плеврис посочи дека бројките покажуваат рационализација на пристигнувањата и дека одлуката за продолжување на суспензијата за азил ќе ја донесе премиерот на крајот на септември.
