Србија подготвува нова фаза на зајакнување на својата армија, откако претседателот Aleksandar Vučić најави значителни инвестиции во одбранбениот сектор. Според него, државата планира да набави современа воена опрема, со посебен фокус на ракетни системи.
Вучиќ посочи дека земјата има финансиска стабилност која овозможува дополнителни вложувања во модернизација на армијата. Тој нагласи дека целта на овој потег е зајакнување на одбранбените капацитети и одржување на безбедноста во време на глобални тензии.
„Србија ќе купува повеќе оружје и ракети. Мораме да бидеме подготвени и да имаме силна војска за да го зачуваме мирот и стабилноста“, изјави српскиот претседател.
Иако не беа откриени конкретни детали за тоа од каде ќе се набавува новото вооружување, Србија во изминатите години купуваше воена опрема од различни земји. Меѓу нив се и француските борбени авиони Dassault Rafale, но и системи и техника од други делови на светот.
Најавата за ново вооружување внимателно се следи и во регионот, бидејќи секое зајакнување на воените капацитети во Балканот предизвикува дополнително внимание од соседните држави и меѓународните организации.
Вучиќ повтори дека Србија останува посветена на политика на воена неутралност и дека модернизацијата на армијата не е насочена против ниту една држава. Според него, главната цел е заштита на граѓаните и државните граници во период кога безбедносната ситуација во светот станува сè понепредвидлива.
