ПРВ.мк
Балкан

ВНИМАНИЕ ВОЗАЧИ И ПАТНИЦИ: Погрешно отварање врата од автомобил носи казна!

ВНИМАНИЕ ВОЗАЧИ И ПАТНИЦИ: Погрешно отварање врата од автомобил носи казна!

Возачите во Србија можат да добијат глоба од 3.000 динари поради неправилно отворање на вратата од паркиран автомобил, дури и ако притоа не дојде до сообраќајна незгода. Законот за безбедност на сообраќајот на патиштата го забранува отворањето на вратите на возилото доколку со тоа се попречува движењето на другите учесници во сообраќајот или се загрозува нивната безбедност. За овој прекршок полицијата може да го казни и сопатникот (путникот), а не само возачот.

Станува збор за ситуација што често се случува при излегување од автомобил паркиран покрај коловозот. Доволно е некој да ја отвори вратата без да провери дали наидува друго возило, велосипедист или мотоциклист и со тоа да го попречи нивното движење или да ја загрози сообраќајната безбедност.

Што вели законот за отворањето на вратите на автомобилот?

Според членот 65, став 2 од Законот за безбедност на сообраќајот на патиштата, на запрено или паркирано возило забрането е отворање на вратата доколку со тоа се попречува движењето на другите учесници во сообраќајот или се загрозува безбедноста.

Тоа значи дека прекршок постои во неколку секојдневни ситуации:

  • Кога возачот ќе ја отвори вратата пред велосипедист кој наидува и го принудува нагло да го смени правецот.
  • Кога сопатникот ќе ја отвори вратата кон коловозот и со тоа ќе го попречи минувањето на друго возило.
  • Кога отворените врати на возилото претставуваат пречка за другите учесници во сообраќајот.

Важно е да се нагласи дека самото отворање на вратата не е забрането. Прекршокот настанува кога со тоа се исполнуваат условите пропишани со закон, односно кога се попречува сообраќајот или се загрозува неговата безбедност.

Колкава е казната и кој ја плаќа?

За прекршување на оваа одредба е пропишана парична казна од 3.000 динари. Износот е утврден во членот 334, став 1, точка 17 од Законот, кој експлицитно се однесува на членот 65, став 2.

Законот предвидува одговорност за лицето кое го сторило прекршокот. Тоа значи дека казната може да ја добие возачот кој неправилно ја отворил вратата, но и сопатникот кој со истиот потег го попречил или загрозил сообраќајот.

Доколку со отворањето на вратата е предизвикана непосредна опасност за друг учесник во сообраќајот или настане сообраќајна незгода, членот 334 предвидува построга парична казна од 5.000 до 15.000 динари.

Како да се избегне казната при излегување од автомобилот?

Пред отворањето на вратата потребно е да се провери сообраќајот зад возилото, да се погледне во ретровизорот и да се утврди дали некој се приближува. Особено внимание треба да се обрати на велосипедистите и мотоциклистите, кои често се движат непосредно покрај паркираните автомобили.

Еден од начините за намалување на ризикот е отворањето на вратата со раката која е подалечна од неа (на пример, со десната рака кога се излегува од левата страна). Таков потег поттикнува вртење на телото и поглед преку рамото, со што многу полесно се забележуваат учесниците во сообраќајот што наидуваат.

Првилото важи за сите што излегуваат од запрено или паркирано возило. Затоа и возачите и патниците треба внимателно да проверат дали можат безбедно да ја отворат вратата, за да избегнат казни, но и можен судир или повредување.