Од 11 ноември, во Словенија стапува на сила нов закон кој воведува целосна забрана за трајно врзување на кучињата. Според новата регулатива, сопствениците нема да смеат да користат синџири, јажиња или други облици на врзување што го ограничуваат движењето на животното.
Законот е донесен со цел да се подобри благосостојбата и заштитата на животните, а прекршувањето на оваа одредба ќе се санкционира со казни до 1.600 евра.
Новите правила пропишуваат дека секое куче мора да има ограден и безбеден простор во кој ќе може слободно да се движи, како и засолниште од дожд, студ и сонце. Иако чувањето на поводник останува задолжително на јавни места, сопствениците нема да смеат да ги држат своите миленици постојано врзани во дворови или градини.
Во образложението на Министерството за земјоделство и животна средина се наведува дека кучињата што се држат на ланец подолг временски период страдаат од хроничен стрес, агресија и нарушувања во однесувањето, како и дека таквиот начин на чување го загрозува нивното физичко и ментално здравје.
Слични мерки и во регионотВо Хрватска веќе постои слична забрана согласно Законот за заштита на животните, но не се спроведува целосно во пракса. Таму, сопствениците кои ќе ги прекршат правилата може да се соочат со казни од 2.600 до 6.600 евра, додека за правни лица глобите изнесуваат до 4.000 евра.
И покрај тоа, во руралните подрачја на Хрватска сè уште е вообичаено кучињата да бидат врзани целиот живот, што предизвикува критики од здруженијата за заштита на животните. Експертите предупредуваат дека законот мора да се спроведува построго, бидејќи трајното врзување предизвикува трајни последици по здравјето и психичката состојба на кучињата.
Со словенечкиот пример, многумина очекуваат дека и други земји од регионот ќе го следат истиот пат и ќе воведат построги закони за хумано постапување со животните, ставајќи крај на суровата практика на држење кучиња на синџир.
