Од крајот на следната година, целосно ќе се укине физичката наплата на патарини – повеќе нема да има рампи, ниту можност за плаќање во готово. Наплатата ќе се врши исклучиво електронски, преку систем за читање регистарски таблички или преку ENC-уреди поврзани со кредитни картички.
Возачите на лесни возила (мотоцикли, автомобили и комбиња до 3,5 тони) ќе можат да избираат помеѓу двете електронски опции, додека возачите на тешки возила ќе мора да користат ENC-уреди. Секое возило ќе мора да биде регистрирано посебно – нема да може да се дели еден ENC уред меѓу повеќе возила, како што беше вообичаено досега.
Патарината ќе се наплатува според изминати километри, а контролата ќе ја вршат надзорници, полиција и царински службеници. Секој што ќе вози без да биде регистриран во системот, ќе плати не само патарина за поминатиот дел, туку и казна од минимум 120 евра. За фирмите, казните ќе достигнуваат и до 1.300 евра.
Властите очекуваат дека со овој систем ќе се намалат метежите и ќе се зголеми пропусноста на автопатиштата.
